ေ၀၀ါးတဲ့ အနာဂတ်ကို
ဇွတ်ဖန်တီးဖို့ စိတ်ကူးမိတဲ့ ညတွေဆို
ခပ်ပါးပါး မျက်ရည်တွေ ကျလာတတ်တယ် မေမေ...။
ဒါပေမယ့် သား မပူပါဘူး
သားဖုန်းဆက်ရင် ကြားခွင့်ရမယ့် မေမေ့အသံကြောင့်
သားရဲ့အနာဂတ်တွေ ပြန်လည်လင်းလက်လာနိုင်လိမ့်မယ်။
အနေအထိုင် မဆင်ခြင်တဲ့ မေမေ့သား
ခဏခဏ ဖျားတတ်တယ်လေ...။
နေမကောင်းရင် အားငယ်တတ်တဲ့ ကောင်လေး
မနက်မနက်ဆို
မေမေ့မျက်နှာကို အရင်ဆုံးမြင်ချင်မိပေမယ့်
မျက်ရည်တွေနဲ့ပဲ မိုးလင်းခဲ့ရတာပါ မေမေ...
သားမကျွမ်းကျင်တဲ့ ခပ်ရှုပ်ရှုပ်မြို့ပြမှာ
အိမ်မှာကုပ်ပြီး စာတွေ ရေးနေခဲ့တာ
မေမေ့ကိုလွမ်းတဲ့ အလွမ်းတွေ
သက်သာစေမလားလို့ပါ...
ည... ညဆို
မေမေများလားလို့ သားက
ယောင်... ယောင်ပြီး
အတူတူအိပ်တဲ့ နေဗိုလ်လေးတို့ အောင်သင်း တို့ရဲ့မျက်နှာကို လိုက်စမ်းမိတဲ့အခါ
အစောကြီး ထရတဲ့ သူတို့တွေက စိတ်ဆိုးတယ်လေ
အိပ်ရေးပျက်လို့တဲ့ မေမေရယ်...။
အလုပ်အဆင်မပြေလို့ အိမ်ပြန်ချင်စိတ်တွေ
ဖြစ်လာခဲ့ရင်လည်း “အလုပ်ကြိုးစားလုပ်” ဆိုတဲ့ မေမေ့အသံက
သားအရမ်းခင်တွယ်ရတဲ့ မွေးရပ်မြေကိုတောင်
ဥပေက္ခာပြုနိုင်ဖို့ အားအင်တွေဖြစ်စေခဲ့တယ်လေ...။
အတိတ်တွင်လည်းမေမေ
ပစ္စုပ္ပန်မှာလည်း မေမေ
အနာဂတ် အတွက်လည်း မေမေ
သားဘ၀ရဲ့ နံပါတ်တိုင်းကို နေရာလပ် မရှိအောင်
လွှမ်းမိုးနိုင်သူဟာလည်း မေမေပါ............။
No comments:
Post a Comment